بشبه عليك

انا بشبه عليك

شوفتك فين قبل كده ... يمكن فى الافلام , لالالالالا , المسلسلات , برضوا لا , يبقى الكليبات , لأأأأأأأأأأأأأأأأأأأأأأأأأأ , خلاص ماتزعلش فى ماتش كورة ...., أفففففففففففف برضوا لأ , طيب اكيد فى اشارة مرور ...... يا سلام  يا خفيف , هو انت فاكرنى  من اللى بيركبوا الاتوبيس ..............., لا اصل انا من كتر ماضيعت عمرى فى اشارات المرور بقيت كل يوم بشوف ناس شوفتها قبل كده عشان كده انا بشبه عليك , طيب افرض انه انا , ايه مشكلتك معايا دلوقتى , حكايتك ايه , هو انت انا متاكد ....., ياربى متاكد من ايه يا عم .., من عصبيتك ونرفزتك اللى على الفاضى والمليان ....., افففففففففففففف وبعدين معاك بقى , هو انت برضوا لسه بتنفخ ياه عليك يا اخى قولتلك دى عاده وحشه ......, لا ده انا كمان بقيت بشتم وبقل ادبى وبضرب لو تحب تجرب وتشوف ..., لالالا يا عم انت ماكنتش كده خالص انت اتغيرت ليه , حصلك ايه , وانت مالك يا سئيل الدم يا خفيف الظل كنت من بقيه اهلى , لا انا مش قريبك والله بس انا برضوا بشبه عليك ...., حد يشيل الراجل ده من قدامى يا ناس الجو حر , هو الحر  اللى مزعلك وعامل فيك كده .... , لا مش الحر , اومال ايه احكيلى , روح يا عم هو انا فاضيلك  ورايا مصالح وشغل وعيال وهباب ازرق اسيب كل ده واقعد احكيلك , ماهو انت لازم تحكيلى عشان اعرف حصلك ايه , وانا احكيلك ليه , عشان انا بشبه عليك , يا عم مش انا مش انا , لا هو انت والله العظيم انت المواطن المصرى اللى بشوفه كل يوم فى اشارة المرور مش قولتلك انا بشبه عليك